Dutu zinazochoma ni kemikali zinazosababisha kuchomwa, kama vile kemikali zilizo katika baadhi ya bidhaa za kusafisha.
Je, sumu ya dutu inayochoma ni nini?
Sumu ya dutu inayochoma hutokea unapomeza kemikali inayokuchoma. Kuchomwa kunaweza kutokea kwenye midomo, mdomo, koo, tumbo, au umio. Umio ni mrija unaounganisha koo na tumbo lako.
Aina hii ya kuchomwa inaweza kusababisha makovu au kuunda mashimo (mapengo). Hii inaweza kusababisha maambukizi makali, ya kuhatarisha maisha.
Sabuni za mashine za kuosha nguo, choo, na baadhi ya sabuni za kuosha vyombo zina dutu hizi za zinazochoma.
Watoto wadogo wanaweza kumeza dutu za kuchoma kwa bahati mbaya
Dutu za kuchoma zinaweza kuwa kioevu au hali ya mango
Ikiwa wewe au mtu mwingine anaweza kuwa amemeza dutu za kuchoma, piga simu kwa usaidizi wa dharura wa matibabu (911 katika maeneo mengi nchini Marekani).
Je, dalili za sumu ya dutu inayochoma ni zipi?
Dalili zinajumuisha:
Maumivu makali ya kinywa na koo mara moja, hasa wakati unameza kitu
Kutokwa mate
Kukohoa
Matatizo kumeza vyakula
Kutapika (au kutapika damu)
Kupumua kwa shida
Ikiwa dutu hiyo ya kuchoma ni kali au inachoma tundu kwenye umio au tumbo lako, unaweza pia kuhisi:
Maumivu makali katika kifua chako
Mapigo ya moyo ya haraka
Kupumua haraka
Kupumua kwa shida
Maumivu ya kifua
Maumivu makali tumboni
Mshtuko (shinikizo la chini sana la damu)
Sumu kali inaweza kukuua.
Ikiwa umio wako utaharibiwa, kuna uwezekano mkubwa wa kupata saratani ya umio siku moja.
Je, madaktari wanawezaje kujua kama nina sumu ya dutu inayochoma?
Madaktari wataangalia mdomo wako ikiwa una alama za kuchomwa na kemikali. Wanaweza pia kutazama chini ya koo lako kwa kutumia endoskopi (mrija wa kutazama unaonyumbulika).
Je, madaktari hutibu vipi mgonjwa mwenye sumu ya dutu inayochoma?
Ikiwa umechomwa kwa kiawango kidogo, madaktari:
Watakwambia unywe maziwa au maji
Watakupa maji ya mishipa ya IV (yanayowekwa kwenye mshipa wako wa damu), ikihitajika
Kukupa dawa ili kukomesha maambukizi
Ikiwa umechomeka sana, madaktari:
Watafanya upasuaji ili kuondoa tishu zilizoharibiwa
Watarekebisha mashimo yoyote kwenye umio au tumbo lako
Kukupa dawa ili kukomesha maambukizi
Watafanya upasuaji ili kupanua au kujenga upya umio wako, ikiwa inahitajika
Usijaribu kutapika dutu inayochoma. Kuitapika husababisha uharibifu mkubwa kama kumeza.
