Je, maambukizi ya njia ya kupumua yanayosababishwa na virusi ni nini?
Njia yako ya kupumua ni njia ambayo hewa hupitia mwilini wakati wa kupumua. Inajumuisha pua lako, koo, bomba la upepo, na mapafu yako na njia zao za hewa. Virusi vingi vinaweza kuambukiza njia yako ya kupumua. Maambukizi ya kawaida ya njia ya upumuaji yanayosababishwa na virusi ni pamoja na kikohozi na mafua ya kawaida.
Maambukizi ya njia ya kupumua ya juu, kama vile kikohozi na mafua, huathiri zaidi pua na koo.
Maambukizi ya njia ya chini ya kupumua, kama vile COVID-19, kifaduro, ugonjwa wa mkamba, na nimonia, huathiri zaidi mapafu na njia za hewa.
Kwa wastani, watoto hupata maambukizi 6 ya njia ya kupumua yanayosababishwa na virusi kwa mwaka—maambukizi hayo huwa yanaenea kutoka kwa mtoto hadi mwingine katika vituo vya kulelea watoto na shule
Maambukizi ya njia ya kupumua yanayosababishwa na virusi husababisha kamasi kutoka puani, kukohoa, na koo kuuma
Maambukizi mengi sio makali, lakini maambukizi mengine husababisha matatizo hatari ya kupumua
Kunawa mikono husaidia kuzuia maambukizi haya kuenea
Chanjo ya mafua na chanjo ya COVID-19 zinapatikana kwa ajili ya kujilinda dhidi ya magonjwa hayo, lakini hakuna chanjo zozote za kikohozi au maambukizi mengine ya njia ya kupumua yanayosababishwa na virusi
Je, chanzo cha maambukizi ya njia ya kupumua yanayosababishwa na virusi kwa watoto ni nini?
Virusi nyingi tofauti husababisha maambukizi ya njia ya kupumua. Watoto hupata maambukizi haya kutoka kwa watoto wengine ambao ni wagonjwa. Kamasi kutoka kwenye pua ya mtoto mgonjwa imejaa virusi. Kamasi huingia kwenye mikono ya watoto na chochote ambacho watoto hao hugusa hupata virusi. Ikiwa watoto wenye afya nzuri watagusa kitu kilicho na virusi na kisha kugusa pua au mdomo wao, wanaweza kupata maambukizi.
Maambukizi ya njia ya kupumua yanayosababishwa na virusi huenea kwa urahisi kati ya vikundi vya watoto, kama vile watoto katika vituo vya kulelea watoto au shule.
Je, dalili za maambukizi ya njia ya kupumua yanayosababishwa na virusi ni zipi?
Dalili zinajumuisha:
Kujaa na kutokwa kamasi puani
Kikohozi
Koo kuwasha
Wakati mwingine homa
Mara nyingi, maambukizi ya njia ya kupumua yanayosababishwa na virusi huchochea shambulizi la pumu kwa watoto walio na pumu.
Maambukizi makali yanaweza kusababisha:
Kupumua kwa shida
Kupumua haraka
Kuforota
Je, mtoto wangu anapaswa kuona daktari kwa maambukizi ya njia ya kupumua yanayosababishwa na virusi wakati gani?
Kwa kawaida watoto wenye afya njema walio na dalili kidogo hawahitaji kumuona daktari.
Muone daktari mara moja ikiwa mtoto wako ana matatizo ya kupumua
Mpeleke mtoto wako kwa daktari ikiwa:
Hanywi
Ana homa
Hapati nafuu baada ya siku chache
Je, madaktari wanawezaje kujua ikiwa mtoto wangu ana maambukizi ya njia ya kupumua yanayosababishwa na virusi?
Madaktari wanaweza kujua kutoka kwa uchunguzi wa mtoto wako. Kwa kawaida, vipimo havihitajiki.
Je, madaktari hutibuje maambukizi ya njia ya kupumua yanayosababishwa na virusi?
Daktari ataelekeza mtoto wako:
Kupumzika
Kunywa maji
Kwa homa na maumivu, kunywa acetaminophen (kama vile Tylenol) au ibuprofeni (kama vile Advil)
Ikiwa mtoto wako ni wa umri wa kwenda shule, mpe dawa ya kupunguza kufungana (watoto wachanga na watoto wadogo hawapaswi kutumia dawa hii)
Ili kupunguza dalili kwa watoto wachanga na watoto wadogo, inaweza kuwa vyema:
Kutumia kifaa cha kuweka unyevu kwenye hewa ya mvuke baridi
Kusafisha kamasi kwenye pua ya mtoto kwa kutumia bomba la kuvuta lililotengenezwa kwa mpira
Dawa za kuua bakteria hazitasaidia na hazihitajiki kutibu maambukizi ya njia ya kupumua yanayosababishwa na virusi.
Je, ninawezaje kumzuia mtoto wangu kutokana na maambukizi ya njia ya kupumua yanayosababishwa na virusi?
Ili kuzuia kuenea kwa maambukizi:
Nawa mikono yako na ya mtoto wako mara kwa mara
Hakikisha watoto wagonjwa wanabaki nyumbani hawaendi kwenye vituo vya utunzaji watoto na shuleni
Pata chanjo ya mafua na chanjo ya COVID-19 kwa watu wazima wote na watoto walio na umri wa miezi 6 au zaidi
