Kansa hukua kwenye mwili wako, inaweza kukuathiri kwa njia kadhaa. Kansa hiyo inaweza:
Kubana tishu iliyo karibu na kusababisha maumivu au kuzuia utendakazi muhimu wa sehemu ya mwili
Kutoa madutu yanayoweza kuhitilafiana na ogani zingine (hali iitwayo matatizo ya paraneoplastiki)
Kwa mfano, kupata uvimbe karibu na kibofu chako cha mkojo (ogani inayobeba mkojo) kunaweza kuzuia mkojo wako kutoka. Saratani iliyo ndani ya mifupa yako husababisha maumivu ya mifupa.
Mwanzoni, saratani haitasababisha dalili zozote kwa sababu ni kikundi kidogo tu cha seli
Kadiri kansa inavyokua, dalili zako zitategemea mahali ilipo
Baadhi ya kansa zinaweza kusababisha dalili kwenye sehemu za mwili wako ambazo haziko karibu na sehemu yako ya kansa
Dalili za saratani ni zipi?
Dalili hutofautiana kulingana na aina ya saratani. Baadhi ya kansa hazitaonyesha dalili hadi zitakapokuwa kubwa kabisa. Zingine huonyesha dalili katika hatua ya awali. Dalili za saratani zinaweza kujumuisha:
Maumivu
Kansa nyingi hazisababishi maumivu mwanzoni
Kadiri kansa yako inavyokua, unaweza kupata maumivu madogo
Kisha, maumivu huongezeka kadiri kansa inavyokuwa kubwa
Si aina zote za kansa husababisha maumivu makali
Kuvuja damu na damu iliyoganda
Saratani inaweza kusababisha kuvuja damu ndani ya mwili wako, kwa kutegemea mahali ilipo:
Saratani iliyo kwenye njia ya mmeng'enyo wa chakula inaweza kusababisha damu kuwepo kwenye kinyesi chako (haja kubwa)
Saratani iliyo kwenye njia ya mkojo inaweza kusababisha damu kuwepo kwenye kmkojo wako
Saratani iliyo kwenye mapafu yako inaweza kukufanya ukohoe damu
Saratani iliyo karibu na ateri kuu inaweza kusababisha shimo kwenye ateri ambalo litavuja damu nyingi mno
Saratani iliyo kwenye uboho (uwazi ulio ndani ya mifupa yako, ambapo seli za damu hutengenezewa) inaweza kuzuia mwili wako kuzalisha seli zinazofanya damu igande:
Kwenye saratani iliyoenea sana, kuvuja damu nyingi kunaweza kusababisha kifo
Aina nyingi za saratani huongeza hatari ya kuwa na damu iliyoganda kwenye mishipa ya miguu yako. Damu iliyoganda kwenye mishipa ya miguu wakati mwingine husafirishwa hadi kwenye mapafu na kuzuia mtiririko wa damu. Hali hii inaweza kusababisha ugumu wa kupumua na wakati mwingine kifo.
Kupoteza uzani na kuhisi udhaifu
Unaweza kupoteza uzani na kuwa mwembamba sana
Chakula kinaweza kukufanya uhisi kichefuchefu tumboni au unaweza kutatizika kumeza
Ikiwa una anemia, unaweza kuwa na uchovu na udhaifu sana kadiri saratani inavyokua
Dalili kwenye misuli na ubongo
Iwapo kansa imekua au imebana neva au uti wa mgongo wako, huenda ukapata:
Maumivu
Udhaifu
Mabadiliko katika hali yako ya kuhisi, kama vile kuwashwawashwa
Kansa ikianza au ikienea kwenye ubongo wako, huenda ukapata:
Kuchanganyikiwa
Kizunguzungu
Maumivu ya kichwa
Hisia ya kichefuchefu tumboni
Mabadiliko katika hali ya kuona
Vifafa
Dalili kwenye mapafu
Kansa ikibana au kuzuia njia za kupitisha hewa kwenye mapafu yako, unaweza kupata:
Kupumua kwa shida
Kikohozi
Nimonia (maambukizi ya mapafu)
