Je, ugonjwa wa kidole tumbo ni nini?
Kidole tumbo chako ni tyubu ndogo yenye umbo la kidole inayopatikana mwishoni mwa utumbo wako mpana. Ugonjwa wa kidole tumbo ni uvimbe unaosababisha kidole tumbo chako kuvimba na kupata maambukizi.
Ugonjwa wa kidole tumbo ni tatizo linalotokea sana
Dalili za kawaida ni maumivu ya tumbo, kuhisi kichefuchefu, na homa
Madaktari hutibu ugonjwa wa kidole tumbo kwa upasuaji na dawa za kuua bakteria
Ugonjwa wa kidole tumbo usipotibiwa, kidole tumbo chako kinaweza kupasuka. Hii husababisha maambukizi katika tumbo lako inayoitwa peritonitis, ambayo inaweza kutishia maisha.
(Angalia pia Ugonjwa wa Kidole Tumbo kwa Watoto.)
Je, ugonjwa wa kidole tumbo husababishwa na nini?
Ugonjwa wa kidole tumbo husababishwa wakati kitu, kama vile kipande kidogo cha kinyesi kigumu (haja kubwa) kimeziba kidole tumbo chako. Uzibaji huu husababisha maambukizi na kuvimba.
Je, dalili za ugonjwa wa kidole tumbo ni zipi?
Dalili za ugonjwa wa kidole tumbo ni pamoja na:
Maumivu yanayoanza katika sehemu ya katikati ya eneo la tumbo la juu na kuhamia kwenye sehemu ya chini kulia kwenye tumbo yako
Maumivu yanayozidi taratibu kwa kipindi cha siku moja au mbili
Maumivu huongezeka ukisogea au ukikohoa au mtu anapobonyeza sehemu yenye maumivu
Kupoteza hamu ya kula
Kuhisi mgonjwa tumboni na kutapika
Wakati mwingine homa ya nyuzi 100 hadi nyuzi 101 Farenhaiti (nyuzi 37.7 hadi nyuzi 38.3 Selsiasi)
Kwa watu wengi na kwa watoto wachanga na wakubwa:
Maumivu yanaweza kutokea kwenye tumbo yote, si tu upande wa chini kulia
Kwa watu wazee na kwa wanawake wajawazito:
Huenda maumivu yasiwe makali sana na eneo la tumbo lisiwe na maumivu sana linapoguswa
Kidole tumbo chako kikipasuka:
Huenda usiwe na maumivu makubwa kwa saa kadhaa
Kisha, maumivu yataongezeka
Maambukizi yanaweza kuenea ndani ya tumbo yako (hali inayoitwa uvimbe wa ngozi ya fumbatio)
Maambukizi yanaweza kuenea kwenye mtiririko wako wa damu na kusababisha baadhi ya ogani zako kuacha kufanya kazi kwa njia ya kawaida (sepsis) na shinikizo la damu yako kupungua hadi kiwango hatarishi (mshtuko wa sepsisi)
Madaktari wanawezaje kujua iwapo nina ugonjwa wa kidole tumbo?
Madaktari wakati mwingine hutambua ugonjwa wa kidole tumbo kulingana na dalili zako na uchunguzi wa mwili. Lakini pia kwa kawaida wanafanya:
Kuna uwezekano zaidi wakatumia kipimo cha picha kwa kutumia mawimbi ya sauti kwa watoto na uchanganuzi wa CT kwa watu wazima.
Je, ugonjwa wa kidole tumbo hutibiwa vipi?
Madaktari hutibu ugonjwa wa kidole tumbo kwa kutumia:
Upasuaji wa kuondoa kidole tumbo chako kwa kukata wazi sehemu ya tumbo au kufanya laparoskopi
Viua vijasumu vinavyotolewa moja kwa moja kwenye mshipa (IV)
Ikiwa kibole chako tayari kimepasuka wakati wa upasuaji, utahitaji kukaa hospitalini na kupata viua vijasumu vya IV na maji kwa muda mrefu ili kuepuka sepsis (shinikizo la chini la damu na viungo vinavyoacha kufanya kazi).
