Kichwa Kidogo cha Mtoto

Hali ya kichwa kidogo ni kichwa kidogo kisicho cha kawaida.

• Kwa kawaida mtoto mwenye kichwa kidogo anakuwa na ubongo mdogo, na ubongo unaweza usiwe umeundwa vizuri

• Hali ya kichwa kidogo ni nadra kutokea

• Hali ya kichwa kidogo inaweza kusababishwa na matatizo mengi ambayo hutokea kwenye mfuko wa uzazi, ikijumuisha maambukizi, ukosefu wa oksijeni, ukosefu wa lishe nzuri, na kasoro za kuzaliwa za ubongo

• Madaktari wanaweza kugundua mtoto ana kichwa kidogo kabla ya kuzaliwa wakati wanafanya kipimo cha kawaida cha picha kwa kutumia mawimbi ya sauti kwa kijusi

• Hakuna tiba ya kichwa kidogo, lakini matibabu yanaweza kuwasaidia watoto katika kuongeza uwezo wao

Microcephaly (Head Size Comparison)

Picha

Image courtesy of Centers for Disease Control and Prevention, National Center on Birth Defects and Developmental Disabilities.

Sababu za kichwa kidogo ni pamoja na:

• Maambukizi kwa mama wakati wa ujauzito, ikijumuisha rubela na maambukizi ya virusi vya Zika

• Matumizi ya dawa fulani au sumu kabla ya kuzaliwa

• Upungufu wa oksijeni kabla au wakati wa kuzaliwa

• Matatizo ya kijenetiki, kama vile ugonjwa wa Down

Mtoto anakuwa na kichwa kidogo kinachoonekana. Dalili zingine za kichwa kidogo hutegemea na kiwango cha uharibifu au udumavu wa ubongo. Dalili zinajumuisha:

• Vifafa

• Kuchelewa kwa ustawi

• Matatizo ya kula

• Matatizo ya kusikia au kuona

• Matatizo ya kutembea au usawa

• Kukosa utulivu 

• Ulemavu wa akili

Maikrosefali

Picha

© Springer Science+Business Media

Madaktari wanaweza kufahamu ikiwa mtoto ana kichwa kidogo pale wanapofanya kipimo cha kawaida cha picha kwa kutumia mawimbi ya sauti kati ya awamu ya mwisho ya kipindi cha 2 cha miezi mitatu na mwanzoni mwa kipindi cha 3 cha miezi mitatu za ujauzito. Ikiwa madaktari watahisi uwepo wa hali ya kichwa kidogo mara baada ya mtoto kuzaliwa, madaktari watafanya:

• MRI (upigaji picha kwa mvumo wa sumaku) au uchanganuzi wa CT (tomografia ya kompyuta) wa ubongo

• Vipimo vya damu

Hakuna tiba ya kuponya au matibabu ya kawaida ya kichwa kidogo. Matibabu yanaweza kujumuisha:

• Kutibu dalili zitokanazo na uharibifu wa ubongo

• Uchukuaji wa hatua za mapema, ambapo huwapatia matibabu watoto ili kuboresha uwezo wao wa kimwili na kiakili