Ugonjwa wa Kifo cha Ghafla cha Mtoto Mchanga (SIDS)

Ugonjwa wa Kifo cha Ghafla cha Mtoto Mchanga (SIDS) ni kifo kisichotarajiwa cha mtoto ambaye hapo awali alionekana mwenye afya. Kifo hutokea wakati wa usingizi bila sababu wazi. Ndio maana wakati mwingine huitwa kifo cha kitanda.

• SIDS mara nyingi hutokea kwa watoto wa miezi 2 hadi 4 lakini inaweza kutokea hadi mwaka 1

• Madaktari hawajui kinachosababisha SIDS lakini wanafikiri huenda inahusiana na jinsi ubongo wa watoto unavyodhibiti kupumua

• Kuwalaza watoto chali na kuweka mito na bampa nje ya kitanda kunaweza kusaidia kuzuia SIDS

• Ni kawaida kwa wazazi na walezi kuhisi mshtuko, huzuni, na hatia—madaktari wanaweza kupendekeza vikundi vya ushauri nasaha na usaidizi kutoka kwa watu waliofunzwa kuwasaidia wazazi hawa kukabiliana na hali hiyo

Madaktari hawajui chanzo cha SIDS. Pengine inahusisha matatizo na sehemu za ubongo zinazodhibiti kupumua na mapigo ya moyo.

Hata hivyo, baadhi ya watoto wana uwezekano mkubwa wa kuwa na SIDS, ikiwa ni pamoja na wale ambao:

• Wanalala kwa tumbo (hatari kubwa zaidi)

• Wanalala katika kitanda cha wazazi wao

• Wanalala kwenye matandiko laini sana

• Ni wavulana, Weusi, na/au Wamarekani Wenyeji

• Wana mama wasio na wenzi, walio chini ya umri wa miaka 20, au wamevuta sigara au kutumia dawa za mitaani wakati wa ujauzito

• Wana familia yenye kipato cha chini

• Wana kaka au dada aliyefariki dunia kutokana na SIDS

Ili kupunguza hatari ya SIDS:

• Weka mtoto mgongoni mwake wakati wa mapumziko na usingizi wa usiku

• Tumia godoro imara kwenye kitanda cha mtoto wako—usilale na mtoto wako kwenye sofa wala kitandani mwako

• Weka vitu laini, kama vinyago, mablanketi, mito na matandiko yaliyolegea mbali na mtoto wako anayelala

• Weka mtoto wako mbali na moshi wa sigara

• Acha mtoto wako alale katika eneo tofauti na wewe, lakini karibu

• Ikiwa mtoto wako anatumia titibandia, mpe safi, kavu kabla ya kulala

• Hakikisha mtoto wako hana joto sana wakati amelala

Usitegemee kifaa cha kufuatilia mtoto kukusaidia kuzuia SIDS.

Ushauri nasaha na usaidizi kutoka kwa madaktari na wauguzi walio na mafunzo maalum na wazazi wengine ambao wamepoteza mtoto kutokana na SIDS ni muhimu sana kusaidia wazazi kukabiliana na janga hilo. Wataalam wanaweza kupendekeza nyenzo za kusoma, tovuti (kama vile Taasisi ya Marekani ya SIDS), na vikundi vya usaidizi ili kuwasaidia wazazi.