Giardiasis

Giardiasis ni maambukizi ya utumbo mdogo yanayosababishwa na kimelea kidogo sana kinachoitwa Giardia.

• Unaweza kupata giardiasis kutokana na kunywa maji machafu

• Wakati mwingine unapata giardiasis kutoka kwa watu wengine wenye maambukizi

• Dalili kuu ni tumbo kukakamaa na kuharisha

• Madaktari wanaweza kufahamu kwamba una maambukizi kwa kupima sampuli ya kinyesi (mavi)

• Ili kuepuka giardiasis, chemsha maji yenye maambukizi kabla ya kuyanywa, hasa maji kutoka kwenye mkondo wa maji au mto

• Madaktari hutibu giardiasis kwa dawa za kuua vimelea

Giardiasis husababishwa na vimelea wadogo wanaoitwa Giardia.

Giardia hupatikana zaidi kwenye maziwa, mito, na mikondo ya maji duniani kote. Pia wanaweza kuwa kwenye maji ambayo yanaonekana kuwa masafi na salama. Wakati mwingine, pia hupatikana kwenye maji ambayo hayakusafishwa vizuri kutoka kwa msambazaji wa maji ya jiji au mabwawa ya kuogelea.

Watu wengi hupata giardiasis kutoka kwenye maji ya kunywa ambayo ya vimelea ndani yake. Kwa sababu watu wenye giardiasis hupitisha vimelea kwenye kinyesi chao, wanaweza kusambaza maambukizi kwa bahati mbaya iwapo vitagusana na kitu ambacho utakiweka mdomoni mwako.

Mara nyingi dalili huanza takribani wiki moja au mbili baada ya kupata maambukizi. Zinajumuisha:

• Kukakamaa kwa tumbo

• Kutoa gesi

• Kuharisha kinyesi chenye majimaji, na harufu mbaya, hali ambayo inaweza kudumu kwa wiki kadhaa

• Tumbo lako kuuma—hisia zinaweza kutokea na kupotea

• Kuchoka na kujihisi vibaya na bila njaa

Kama kuhara kutadumu kwa kipindi kinachozidi wiki chache, hali hii inaweza kuzuia mwili wako kupata virutubishi unavyovihitaji. Unaweza kupungua uzani. Watoto ambao wanaendelea kuhara wanaweza kupata matatizo katika ukuaji wao.

Madaktari watakuuliza kuhusu dalili zako na watafanya:

• Vipimo vya kinyesi

Daktari hutibu giardiasis kwa:

• Dawa za kuzuia vimelea

Madaktari hutibu tu watu ambao wana dalili.

Wewe na jamii yako mnaweza kuepusha giardiasis kwa:

• Kuwa na maji ya umma yaliyosafishwa vizuri, ikijumuisha maji ya kunywa na maji yaliyo kwenye mabwawa ya kuogelea

• Kunawa mikono kabla ya kuandaa chakula

• Kunawa mikono vizuri baada ya kutumia choo

• Kuepuka kugusana na kinyesi wakati wa kushiriki ngono

• Kuchemsha maji yaliyochotwa kwenye mito na ziwa kabla ya kuyanywa