Kipindi cha Baada ya Kujifungua ni muda baada ya kupata mtoto. Kawaida inachukuliwa kuwa wiki 6 za kwanza baada ya kujifungua.
Maambukizi ya kibofu na figo baada ya kujifungua ni nini?
Figo zako ni viungo 2 vya umbo la maharagwe vinavyotengeneza mkojo. Kibofu chako ni kiungo tupu kinachoshikilia mkojo mpaka unapokwenda kukojoa. Unaweza kupata maambukizi ya kibofu (mwasho wa kibofu cha mkojo) au maambukizi ya figo ikiwa bakteria zitaingia kwenye viungo hivi baada ya kujifungua.
Njia ya Mkojo
Dalili za maambukizi ya kibofu au figo ni maumivu wakati wa kukojoa au haja ya kukojoa mara kwa mara
Madaktari hutibu maambukizi kwa kutumia dawa za kuua bakteria
Kuna uwezekano mkubwa wa kupata maambukizi ya kibofu cha mkojo baada ya kujifungua ikiwa ulikuwa na katheta (mrija mwembamba, unaonyumbulika) iliyowekwa kwenye kibofu chako ili kutoa mkojo kabla au baada ya kujifungua.
Ni dalili zipi za maambukizi ya kibofu na figo baada ya kujifungua?
Dalili zinajumuisha:
Maumivu wakati unakojoa
Haja ya kukojoa mara kwa mara
Homa
Maumivu katika mgongo wako wa chini au upande
Kujisikia mgonjwa kote mwilini
Madaktari wanajuaje kama nina maambukizi ya kibofu na figo baada ya kujifungua?
Madaktari hufanya vipimo vya mkojo ili kuangalia maambukizi ya kibofu cha mkojo na figo.
Madaktari hutibu vipi ugonjwa wa kibofu cha mkojo na figo baada ya kuzaa mtoto?
Madaktari hutibu maambukizi ya kibofu na figo kwa kutumia antibiotiki. Daktari wako pia anaweza kukunywesha maji mengi ili kusaidia figo zako kufanya kazi vizuri na kuondoa bakteria kutoka kwa mwili wako.
Madaktari watafanya uchunguzi mwingine wa mkojo wiki 6 hadi 8 baada ya mtoto wako kuzaliwa ili kuhakikisha kuwa maambukizi yamepona.
