Rosasia ni nini?
Rosasia ni ugonjwa wa ngozi ambao hufanya pua yako na eneo linaloizunguka kuwa jekundu, kuvimba, na kufunikwa na chunusi ndogo na mishipa ya damu iliyovimba.
Rosasia huwapata zaidi watu wenye umri wa miaka 30 hadi 50, hasa watu wenye asili ya Ireland na Ulaya ya Kaskazini
Wakati mwingine rosasia hufanana chunusi
Matibabu yanajumuisha dawa za kuua bakteria
Kuepuka baadhi ya vyakula, pombe, vinywaji vya moto, mwanga wa jua, joto kali, upepo, na vipodozi kunaweza kukusaidia kupunguza dalili
Je, nini husababisha rosasia?
Madaktari hawajui kinachosababisha rosasia. Walio na ngozi nyororo wana uwezekano mkubwa wa kupata ugonjwa huu.
Ikiwa tayari una rosasia, dalili zako zinaweza kuchochewa na:
Vyakula vyenye viungo vingi
Pombe
Vinywaji vya moto
Malai ya kuzuia miale ya jua au vipodozi
Msongo wa mawazo
Hali ya hewa ya baridi au joto, mwanga wa jua, au upepo
Mazoezi au kuoga maji ya moto
Dawa fulani
Dalili za rosasia ni zipi?
Rosasia hukuathiri uso na kichwani pekee. Kwa kawaida hali yake huzidi kuwa mbaya baada ya muda (miaka au miongo).
Kwanza, ngozi ya mashavu yako na pua huwa nyekundu kwa kipindi kirefu kuliko kawaida na inaweza kuchoma lakini vinginevyo ni kawaida
Ikiwa rosasia itaendelea, mara nyingi ngozi yako huwa na mwonekano mwekundu na kuvimba, yenye mishipa midogo ya damu yenye kuonekana chini tu ya tabaka la juu la ngozi
Unaweza kupata vichunusi vidogo
Katika hatua za mwisho, ngozi ya pua yako huongezeka unene, hivyo kuonekana nyekundu na iliyovimba
Picha kwa hisani ya Thomas Habif, MD.
Pia rosasia inaweza kuathiri macho yako. Dalili zinajumuisha:
Kuvimba kwa vigubiko vya macho au macho
Kuwasha
Wekundu
Hisia kama kuna kitu kwenye jicho lako
Madaktari wanawezaje kujua ikiwa nina rosasia?
Daktari anaweza kubaini ikiwa una rosasia kwa kuangalia uso na kichwa chako.
Je, madaktari hutibu vipi rosasia?
Madaktari hutibu rosasia kwa njia zifuatazo:
Malai ya dawa za kuua bakteria au vidonge amabvyo vinafanana na vile vinavyotumika kwa chunusi
Jeli ya brimonidine au malai ya oksimetazolini kupunguza wekundu
Kwa mishipa ya damu inayoonekana, leza au elektrokodari (mkondo wa umeme kwenye ngozi yako ili kutibu mishipa ya damu inayoonekana)
Kwa pua yenye ngozi nene, kusugua ngozi (hatua ya kusugua na kuondoa ngozi ya ziada); au upasuaji ili kuondoa ngozi ya ziada
Pia madaktari watakufanya ujiepushe na vitu vinavyochochea rosasia yako.
